Уимблдон теннисшілердің талабынан кейін жүлде қорын көбейтті
АСТАНА. KAZINFORM — 2026 жылы қатысушылар өткен маусыммен салыстырғанда 20%-ға артып, 64,2 миллион фунт стерлингке (85,7 миллион доллар) бәсекелеседі. Бұл турнир тарихындағы төлемдердің ең үлкен өсімі, деп хабарлайды Reuters.
Уимблдон ерлер мен әйелдер арасындағы жекелей сында жеңіске жеткен ойыншыларға 3,6 млн фунт стерлинг (шамамен 4,8 млн доллар) көлемінде жүлде беріледі. Өткен жылы чемпиондардың жүлде қоры 3 миллион фунт стерлинг болған.
Сонымен қатар жүлде қорының рекордтық өсуіне қарамастан, бірқатар теннисшілер Үлкен дулыға турнирлерінің қаржылық моделін қайта қарауды талап етіп отыр. Олардың пікірінше, турнир ұйымдастырушылары табыстың ойыншыларға бөлінетін бөлігін ATP және WTA турнирлерімен салыстырғанда төмен деңгейде ұстап келеді.
Ойыншылар өкілдері Уимблдонның жалпы жүлде қорын шамамен 70 млн фунт стерлингке (шамамен 95 млн доллар) дейін арттыруды ұсынған. Бұл жағдайда табысты бөлу деңгейі ATP және WTA турнирлеріне жақындайды, онда ойыншылар табыстың шамамен 22%-ын алады. Ал Үлкен дулыға жарысында бұл көрсеткіш шамамен 15% деңгейінде.
Дебби Джеванстың айтуынша, Уимблдон коммерциялық емес ұйым және түскен табыстың басым бөлігін Ұлыбританиядағы теннисті дамытуға жұмсайды. Оның сөзінше, артық қаражаттың шамамен 90%-ы ұлттық теннис жүйесіне қайта инвестицияланады.
Жүлде мөлшерінен бөлек, теннисшілер зейнетақы жүйесі, турнирлік кестенің кеңеюі, матчтардың кеш аяқталуы және ұйымдастырушылармен байланыс мәселелерін де көтеріп отыр.
Осыған дейін қазақстандық шахматшы Бибісара Асаубаева Мемлекет басшысынан қолдау көрсетуді сұраған еді. Туризм және спорт министрлігі оның үндеуіне жауап берді.
