Үкімет басшысы тамызға дейін «Энергия үнемдеу - 2020» бағдарламасының жобасын даярлауды жүктеді
АСТАНА. 14 мамыр. ҚазАқпарат - Премьер-Министр Серік Ахметов ҚР Индустрия және жаңа технологиялар министрлігіне өзге мемлекеттік органдармен бірлесіп биылғы 1 тамызға дейін Үкімет қарауына энергия үнемдеудің 2020 жылға дейінгі аралығына негізделген бағдарламаның жобасын енгізуді тапсырды.
Бұндай тапсырманы ол бүгін болған Үкімет отырысында жүктеді.
Осы орайда С. Ахметов бағдарламаның барлық жағдайы тыңғылықты қарастырылуы, оның ішінде қаржыландыру бағыттары жан-жақты зерделенуі қажет екенін атап өтті.
«Негізгі талаптар мен нормаларды заңдардың деңгейінде қарастыру керек. Олар нақты әрі түсінікті және тікелей іс-қимылға бағытталуы қажет. Егер де олар жауапкершілік деңгейінсіз, міндетсіз, бұлыңғыр болса, онда бұл бағдарлама орындалмай тұйыққа тірелетіні сөзсіз»,-деді Премьер-Министр.
