Үкімет халықты еңбекпен қамтудың жаңа бағдарламасымен танысты

АНА. 5 ақпан. ҚазАқпарат /Марлан Жиембай/ - Бүгін Үкімет отырысында ҚР Еңбек және халықты әлеуметтік қорғау министрі Гүлшара Әбдіхалықова 2020 жылға дейін арналған халықты еңбекпен қамту жаңа бағдарламасының жобасын Министрлер Кабинеті мүшелерінің назарына ұсынды.

Министрдің атап өтуінше, бағдарлама үш бағыт бойынша жүзеге асырылатын болады. Оның біріншісі - оқыту арқылы белсендіру әрі одан ары жұмысқа орналастыру және әлеуметтік қолдау көрсету. Екіншісі - экономикалық өсім нүктесіне қоныс аударуды ұйымдастыру арқылы еңбек ресурстарының жеделдігін арттыру. Үшіншісі - ауылдық жерде кәсіпкерлікті дамыту.

«Бағдарлама 2011 жылы үлгі жоба ретінде қарастырылады. Ал 2012 жылдан бастап толыққанды жүзеге асыру болжануда», - деді министр.

2015 жылға қарай аталған бағдарламаның 1,5 миллионға жуық адамды қамтитындығын атап өткен ол: «Оны жүзеге асыру республикадағы кедейшілік деңгейін 6 пайызға дейін төмендетуге сонымен қатар, әрине жұмыссыздық деңгейінің 5,5 пайыздан асып кетпеуіне мүмкіндік береді», - деді г.Әбдіқалықова.