Үкімет ірі кәсіпорындарды шағын және орта бизнесті қолдау жөніндегі бағдарламаға қосты

деп хабарлайды ҚазАқпарат. «Көптеген кәсіпкерлердің ортақ көзқарасы Үкіметке олардың салалық және басқа да қауымдастықтары арқылы келіп түсуде. Премьер-Министр басқаратын Үкіметтің дағдарысқа қарсы кеңесіндегі көптеген талқылаулардан кейін ірі кәсіпорындарды, әсіресе ауылшаруашылығы өнімдерін өңдеумен және азық-түлік тағамдарын өндірумен шұғылданатындарын шағын және орта бизнесті қолдау жөніндегі бағдарламаға қосу жөнінде шешім қабылданды», деді бүгін Астанада өткен BNews.kz порталындағы интернет конференцияда Вице-премьер Серік Ахметов. Оның айтуынша, мұндай кәсіпорындар шағын және орта бизнес субьектілерін несиелеу үшін екінші деңгейлі банктерге орналастырылған қаржының 30 пайызы аясында несилендіріле алады.Сонымен қатар, ол қазіргі таңда «Самұрық-Қазына» қоры Үкіметпен бірлесіп өңдеуші саладағы ірі кәсіпорындарды несиелеу жөніндегі жеке бағдарламаны қабылдау мүмкіндігін қарастырып жатқанын атап өтті.