Үлескерлердің 222,5 млн. теңгесін жымқырды деген айып тағылған «Капитал строй сервис» директорының ісі прокуратураға жіберілді
АСТАНА. ҚазАқпарат - «Алаяқтық» бабымен айыпталып отырған «Капитал строй сервис» ЖШС-нің негізін қалаушы және директоры И.В.Дмитриенконың ісі прокуратураға жіберілді, деп хабарлайды Астана қаласы ІІД баспасөз қызметі.
Еске сала кетейік, тергеу басқармасы «Гранитный» ТК-нің 44 үлескерінің 222 523 000 теңге көлеміндегі ақшалай қаражатын ұрлады деген күдікпен «Капитал строй сервис» ЖШС-нің негізін қалаушы және директоры И.В.Дмитриенконы ұстады.
22 қазан күні Астана қаласының № 2 Сарыарқа аудандық соты оны қамауға алу туралы санкция шығарды.
Қазіргі уақытта сот алдындағы тергеу барысында жиналған іс материалдарымен күдікті И.В.Дмитриенконың ҚР ҚК-нің «Алаяқтық» бабында қарастырылған қылмысты жасағаны дәлелденді. Іс ҚР ҚПК-нің 300-бабының тәртібінде сотқа берілу үшін Астана қаласының Сарыарқа аудандық прокуратурасы жіберілді.
