Үлескерлердің ақшасын қолды еткен құрылыс фирмасының директоры БАӘ-ден Қазақстанға экстрадицияланды

None
None
АСТАНА. ҚазАқпарат - Бүгін Бас прокуратураның қызметкерлері Біріккен Араб Әмірліктеріндегі Қазақстан елшілігінің қолдауымен ҚР ҚК 176-бабының 3-бөлігі «б» тармақшасы (Сеніп тапсырылған бөтен мүлікті иеленіп алу немесе ысырап ету) бойынша қылмыс жасағаны үшін іздеудегі 45 жастағы Мирхат Әлімбетовті БАӘ-ден Астанаға жеткізді, деп хабарлайды Бас прокуратураның баспасөз қызметі.

Әлімбетов «Какаду» ЖШС-нің негізін қалаушысы және директоры бола отырып, Астанада 2005-2008 жылдар аралығында «Қыпшақ» тұрғын-үй кешенін салу барысында 397 043 330 теңге сомасында салымшылардың ақшасын және  434 541 991 теңге сомасында мемлекеттік қаражатты заңсыз иемденгені үшін айыпталуда.

2012 жылы ол Дубай қаласында екені анықталды. 4 сәуірде БАӘ құқық қорғау органдары айыпталушыны Қазақстанға беру туралы шешім шығарды.

Қазіргі уақытта Әлімбетов Астана қаласының тергеу изоляторына қамауға алынды, тергеуді Астана қаласының ІІД жүргізуде.

Бас прокуратура қылмыс жасағаны үшін шетелде жасырынып жүрген Қазақстан азаматтарын экстрадициялауға бағытталған жұмыстарды жүргізуде. Шет мемлекеттердің құзырлы органдарымен жасырынып жүрген қылмыскерлерді қайтару және жасалған қылмыстары үшін жазаның бұлтартпастығын қамтамасыз ету бойынша белсенді ынтымақтастық орнатылған.

Соңғы бес жыл ішінде осы жұмыс аясында Қазақстанға 349 адам берілді, 100-ден астам сұраныстар шет мемлекеттердің құзыретті органдарымен қарастырылуда.

Қадағалау органы  Қазақстан азаматтарының шет елдерден берілуіне қол жеткізуде, мысалы, тек соңғы екі жыл ішінде Біріккен Араб Әмірліктерінен 8 адам берілді, сондай-ақ Испания, Португалия, Румыния, Швеция, Болгария, Германия және Финляндиядан да адамдар Қазақстанға берілген болатын.

Соңғы жаңалықтар
telegram