Ұлыбритания королі Чарльз III қатерлі ісіктің жанама әсеріне байланысты ауруханаға түсті

АСТАНА. KAZINFORM — Сақтық үшін монархтың бағдарламасы ертеңге ауыстырылады, деп жазды Анадолы сайты. 

Ұлыбритания королі Чарльз III онкологиялық ауруды емдеудің уақытша жанама әсеріне байланысты ауруханаға жатқызылды, деп хабарлайды Букингем сарайы.

— Бүгін таңдағы жоспарлы әрі жалғасып жатқан емнен кейін король уақытша жанама әсерді сезген. Бұл жағдай ауруханада қысқа мерзімді бақылауды қажет етті. Осы себепті Мәртебелінің күндізгі бағдарламалары кейінге қалдырылды, — делінген мәтінде.

Сонымен қатар, сақтық шарасы ретінде дәрігерлердің ұсынысына сәйкес корольдің ертеңгі бағдарламасы кейінге шегерілетіні хабарланды.

2024 жылдың қаңтарында Король Чарльз III қуық асты безінің аденомасынан емделетіні айтылған еді.

Король 26 қаңтарда ауруханаға жатқызылып, 29 қаңтарда үйіне шығарылды. Букингем сарайы 5 ақпанда корольдің қатерлі ісікке шалдыққаны тест нәтижелері бойынша анықталғанын хабарлады.

Бұған дейін жазғанымыздай, Король Чарльз III қуықасты безінің ұлғаюына байланысты жасалған отадан кейін Лондон ауруханасынан шықты.