Ұлытау облысында 25-тен астам ірі әлеуметтік және инженерлік-коммуникациялық жоба жүзеге асырылады
ЖЕЗҚАЗҒАН. KAZINFORM – Президент тапсырмасы бойынша Ұлытау облысында 25-тен астам ірі әлеуметтік және инженерлік-коммуникациялық инфрақұрылым жобалары жүзеге асырылады.
Бұл туралы Ұлытау облысының әкімі Есет Байкен сұхбат барысында мәлімдеді.
Үкіметтің қолдауымен өңірде әлеуметтік және инженерлік-коммуникациялық инфрақұрылымды дамытуға бағытталған 25-тен астам бірінші кезектегі жобаны кезең-кезеңімен жүзеге асыру жұмыстары басталды. Аталған жобалар ұлттық компаниялар және ірі бизнес өкілдерімен бірлесіп іске асырылады.
Өңірдің стратегиялық серіктестерінің бірі – «Қазақмыс корпорациясы» ЖШС. Облыс әкімдігі мен корпорация арасында Жезқазған қаласында заманауи теннис орталығын салуды және 6 мың көрерменге арналған жаңа жабық футбол стадионын жобалауды көздейтін меморандумға қол қойылды.
Облыс әкімінің айтуынша, жаңа спорт нысандары тұрғындарға, әсіресе балалар мен жастарға спортпен шұғылдануға қосымша мүмкіндіктер береді.
