Ұлттық форма спортшыларымыздың көңілінен шықты – Диас Ахметшәріп
АСТАНА. KAZINFORM – Париж Олимпиадасында киетін ұлттық формасы спортшыларымыздың көңілінен шығып, қызығушылықтарын оятқан. Бұл туралы Кazinform тілшісіне эксклюзив сұхбат берген ҚР Туризм және спорт министрінің қоғаммен байланыс және БАҚ жөніндегі кеңесшісі Диас Ахметшәріп айтып берді.
- Дияс мырза, Париж Олимпиадасының басталуына санаулы ғана күндер қалды. Биылғы Олимпиада ойындарына арнап тігілген ұлттық форма спортшыларымыздың қолына тиді ма?
- Иә, Франция астанасы Париж қаласында өтетін ХХХІІІ жазғы Олимпиада ойындарының басталуына небары екі апта уақыт қалды. Біз спортшыларымызға арнап арнайы тігілген ұлттық формаларымызды біртіндеп тарата бастадық. Олимпиадаға жолдама алған спортшыларымыздың басым бөлігі Еуропа елдерінде соңғы оқу-жавттығу жиындарын өткізуде. Оған басты себеп – спортшыларымыз Парижге жетуге өте ыңғайлы болу үшін арнайы оқу-жаттығу жұмыстары солай жоспарланған.
Біз ол жақтағы спортшыларымызға формаларын арнайы жеткізіп беріп жатырмыз. Ал елімізде жаттығып жатқан спортшыларымызға осыдан бірқанша күн бұрын тараттық.
Осыдан бірер күн бұрын мемлекет басшысы Қасым-Жомарт Тоқаев спортшыларымзға Мемлекеттік туды тапсырғанда атлеттеріміз спорттық формасын киіп барды. Бірінші болып форманы боксшылар, дзюдошыларымыз және жеңіл атлеттеріміз қолдарына алған болатын.
Спортшыларымыздың алғашқы легі 20 шілдеде Парижге аттанады. Оған дейін барлығы киіммен қамтамасыз етіледі.
- Спортшыларымыз ұлттық форманы қалай қабылдады? Ұнатты ма?
- Әрине, бірден ұнатты, көңілдерінен шықты. Себебі – форма өте сапалы материалдан, спортшыларымызға ыңғайлы етіліп тігілген. Олимпиада ойындары тұсында Париж қаласы өте ыстық болуы мүмкін. Сол себепті біз киімнің матасына ерекше назар аудардық. Ыстықта ауа өтетіндей, терлегенде денеге жабысып, жүріп-тұрғанда тырысып қалмайтыындай өте жеңіл, денеге барынша ыңғайлы матаны таңдадық.
Дизайынын да осыған дейін таныстырғанда өздеріңіз көрдіңіздер. Тігісі де өте сапалы шықты. Содан да болар форманы алған спортшыларымыз өте жоғары деңгейде бағалап, разылықтарын білдірді.
Тіпті, «мына форманы киіп барып, жүлдесіз келу мүмкін емес» деп айтып жатыр. Лайым, солай болғай, жетістігіміз көп болсын деп тілей берейік...
- Жалпы, биылғы Олимпиада формасы несімен ерекшеленеді?
- Біз Париж Олимпиадасының формасын тіктіру барысында өткен жылғы Азия ойындарындағы олқылықтарды ескердік. Сол үшін арнайы комиссия құрдық. Оның құрамына бұрынғы Олимпиада чемпиондары, қазіргі спортшылар мен бапкерлер, журналистер, министрлік өкілдері, белгілі қоғам қайраткерлері кірді.
Бірінші кезеңде үміткерлердің ұсынған жұмысы комиссия мүшелерінің көңілінен шықпады. Екінші кезеңде 15 жұмыс ұсынылып, соның ішінен ең үздігін ашық түрде комисся мүшелері дауысқа салып таңдап алды. Нәтижесінде таңдап алынған екі компания форманың үш түрін тігіп берді. Оның ішінде спорттық форма, жарыс формасы, сондай-ақ, Олимпиада ойындарының салтанатты ашылу және жабылу рәсімінде киетін арнайы форма бар.
Парадтық форманың жеңін арнайы қысқа қылып тіктірдік. Себебі, Парижде ауа райы өте ыстық болатындықтан біз солай шешім қабылдадық. Ең бастысы ұлттық формамыз спортшыларымызға ұнады.
- Әңгімеңізге рахмет!
