Ұлттық ұланының офицері Қызылордадағы көп қабатты үйлердің бірінде өрттің алдын алды

ҚЫЗЫЛОРДА. KAZINFORM – Қызылордада ҚР ІІМ Ұлттық ұланының 5547 әскери бөлімінің әскери жасақтар бойынша кезекшісі капитан Абай Жандар қызмет атқару барысында қырағылық пен жеделдік танытып, көпқабатты үйдегі өрт салдарынан болуы мүмкін қайғылы жағдайдың алдын алды.

Ұлттық ұлан
Фото: Ұлттық ұлан

Әскери жасақтарды тексеру барысында ол көпқабатты үйлердің бірінің жертөлесінде өрт шыққанын байқаған.

— Жағдайды бағалап, тез арада өрт сөндіру қызметіне қоңырау шалып, тұрғындарды сыртқа шығара бастадым. Кіші сержант Сергей Образцов пен қатардағы жауынгер Дамир Бисенбаевтың көмегімен үйді қоршауды ұйымдастырдық. Басқа әскери қызметшілер тұрғындарды өрт аумағынан қауіпсіз қашықтыққа апарып, қауіпсіздіктерін қамтамасыз етті, - дейді капитан Абай Жандар.

Оқиға орнына келген өрт сөндірушілер тілсіз жауды ойдағыдай сөндіріп, сын сағаттағы жедел әрі кәсіби іс-қимылдары үшін ұландықтарға алғыс білдірді.

ҚР ІІМ Ұлттық ұланы әскери қызметшілері мен өрт сөндіру мамандарының үйлесімді жұмысының нәтижесінде зардаптар мен залалдарға жол берілмеді. Үй тұрғындарының айтуынша, капитан Абай Жандардың және оның қарамағындағы сарбаздардың әрекеттері үрей тудырмай, эвакуация кезінде тәртіпті қамтамасыз етті.

— Біз Ұлттық ұлан жауынгерлерінің қайсарлығы мен жедел көмектері үшін ризашылығымызды білдіреміз. Олардың кәсібилігінің арқасында біздің өміріміз аман қалды, - дейді үй тұрғындарының бірі.

Өрттің шығу жағдайлары анықталуда.

Бұған дейін Петропавлдағы «Жастар» стадионында жабық корт өртенді.

Соңғы жаңалықтар