Ұлттық банк төрағасы базалық мөлшерлемені 14 пайыз деңгейінде сақтауға қатысты пікір білдірді

НҰР-СҰЛТАН. ҚазАқпарат – Жылдық мәнде инфляция мамырда 14 пайызға жетті. Бұл туралы елордадағы баспасөз мәслихатында ҚР Ұлттық банкінің төрағасы Ғалымжан Пірматов мәлім етті, деп хабарлайды ҚазАқпарат тілшісі.

«Ұлттық банктің Ақша-кредит саясаты комитеті 2022 жылғы 7 маусымнан бастап базалық мөлшерлемені 14 пайыз деңгейінде сақтау жөнінде шешім қабылдады. Біздің шешіміміз болжамды раундтың нәтижесінде қабылданды. Қазақстандағы макроэкономикалық ахуалдың бұдан кейінгі дамуына қатысты болжамды жаңарттық», - деді Ғ. Пірматов.

Осы орайда ҰБ басшысы базалық мөлшерлеме бойынша қабылданған шешімге негіз болған факторларды түсіндірді.

«Наурыздағы өзгерістен кейін айлық инфляция сәуірде 2%-ға дейін және мамырда 1,4%-ға дейін баяулады. Алайда, өткен жылғы көрсеткіштерден, сол сияқты, әдеттегі өзінің орташа жылдық мәнінен айтарлықтай асып, жоғары қалпында қалды. Жылдық мәнде инфляция мамырда 14%-ға жетті, бұл ретте барлық құрамдас бөліктер бойынша бағаның өскені байқалды. Жылдық мәнде 19%-ға жеткен азық-түлік өнімдері бағасының өсуі де елеулі үлес қосты», - деді Ғ. Пірматов.

Оның сөзіне қарағанда, азық-түлік өнімдеріне жатпайтын инфляция импортты тауарлардың қымбаттауына байланысты 11,9%-ға дейін қарқын алды. Реттелетін коммуналдық қызметтер бағасының өсуіне енгізілген мораторийдің тежеуші әсеріне қарамастан, ақылы қызметтердің инфляциясы 9,1%-ға дейін өсті.

Бұдан бұрын хабарланғандай, биыл сәуір айында Ұлттық банк базалық ставканы көтеру себебін түсіндірген болатын.