«Ұлттық чемпиондар» бағдарламасы ішкі инвестициялар өсімін 750 млн. долларға дейін қамтамасыз етеді -Т.Жақсылықов

АСТАНА. ҚазАқпарат - Елімізде «Ұлттық чемпиондар» бағдарламасын жүзеге асыру ішкі инвестициялар өсімін 750 млн. долларға дейін қамтамасыз етеді. Бұл туралы бүгін ҚР Президенті жанындағы ОКҚ-дегі баспасөз мәслихатында Ұлттық экономика вице-министрі Тимур Жақсылықов мәлім етті.

«Қолда бар есептеулерге сәйкес аталған бағдарламаның арқасында тікелей ішкі инвестициялардың өсімі шамамен 750 млн. долларды құрайтын болады және шамамен 15 мың жаңа жұмыс орны құрылады. Ең өнімділігі 20-50 пайызға дейін артатын болады», - деді ол.

Вице-министрдің атап өтуінше, аталған бағдарлама экономиканың белгілі бір саласындағы нақты компанияны ірікеп алу арқылы оған мақсатты көмек көрсету арқылы экономиканы әртараптандыруды болжайды.

«Яғни, біз рет-ретімен барынша бәсекеге қабілетті, болашағы қуатты компанияларды іріктеп алып, кейіннен олардан ұлттық чемпиондар өсіріп щығару үшін белгілі бір мемлекеттік қолдау топтамаларын көрсететін боламыз», - деді Т.Жақсылықов.