Ұлттық қордан берілетін трансферттерді бақылау күшейтіледі – Әлихан Смайылов
НҰР-СҰЛТАН. ҚазАқпарат – Ұлттық қордан берілетін трансферттерді бақылау күшейтіледі. Бұл туралы Үкімет үйінде өткен брифингте ҚР Премьер-Министрінің бірінші орынбасары Әлихан Смайылов айтты, деп хабарлайды ҚазАқпарат тілшісі.
«Мемлекеттік қаржының тиімділігін арттыру және Ұлттық қордың активтерін қалпына келтіру мақсатында арнайы Мемлекеттік қаржыны басқару тұжырымдамасы қабылданады. Ол бюджет саясатын, мемлекеттік борышты басқару, сондай-ақ Ұлттық қордың қаражатын қалыптастыру және пайдалану мәселелерін қамтиды. Мемлекеттік шығыстардың тиімділігін және Ұлттық қордан берілетін трансферттерді бақылау күшейтіледі», - деді бірінші вице-премьер.
Осы ретте ол тұжырымдаманың негізгі тәсілдері ретінде мемлекеттік борыштың өсуін шектеу және оны қауіпсіз деңгейде ұстап тұру үшін бюджет тапшылығын кезең-кезеңімен төмендету; борыш тұрақтылығының негізгі көрсеткіштерін белгілеу; барынша экономикалық тиімділікке қол жеткізу үшін келесі шараларды айқындау ұсынылғанын айтты.
«Бюджет кірістерін ұлғайту бөлігінде көлеңкелі экономикаға қарсы іс-қимыл жөніндегі іс-шаралар жоспары іске асырылуда. Жоспарда бизнесті көлеңкеден шығуға ынталандыруға, салық және кеден төлемдерін төлеуден жалтаруға қарсы күресті күшейтуге бағытталған іс-шаралар көзделген. Сондай-ақ, артық тосқауылдарды алып тастау және заңсыз сауда айналымына қарсы іс-қимыл бойынша ауқымды іс-шаралар жүргізілуде», - деді Әлихан Смайылов.
