Ұлыбританияның Еуропалық одақтан шығуы мұнай нарығына әсер етеді - Ұ.Қарабалин
АСТАНА. ҚазАқпарат - Ұлыбританияның Еуропалық одақтан шығуы мұнай нарығына әсер етеді. Бұл пікірді бүгін «Энергия болашағы және жапондық технология» атты жапондық-қазақстандық ынтымақтастық жөніндегі семинар аясында БАҚ өкілдеріне сұхбат берген KAZENERGY қауымдастығы төрағасының орынбасары Ұзақбай Қарабалин.
«Бұл бағаға әсер етеді. Алғашқы қозғалыстарды өздеріңіз де байқап отырсыздар. Мұнайдың белгілі бір деңгейде төмендеуі байқалады. Қазір бағаның экономикалық негізі - мұнайдың баррелі 50 долларды шамасында белгіленуде. Баға сұраныс, өндіріс сынды нарықтық факторлар есебінен қалыптасады. Кейде түрлі саяси сәттер де ықпал ететіні бар. Мұны біз бүгінде байқап отырмыз», - деді ол.
Естеріңізге сала кетейік, 23 маусымда Ұлыбританияда елдің Еуропалық одақ құрамына шығу-шықпауына қатысты референдум өткен болатын. Оның нәтижесінде ел халқының 52 пайызы одақ құрамынан шығуды жақтап дауыс берді.
