Ұлытау облысында инженерлік инфрақұрылым 80% тозған
АСТАНА. ҚазАқпарат – Ұлытау облысының әкімі Берік Әбдіғалиұлы өңірдің шешілмей жатқан өзекті мәселелері туралы айтып берді, деп хабарлайды ҚазАқпарат тілшісі.
«Өңірде көптеген проблемалар шешілмей, қордаланып қалғаны өздеріңізге аян. Ол күрделі экологиялық ахуал, ауыз су сапасының төмендігі, оған қоса инженерлік инфрақұрылымдардың тозуы 80% асады, апаттық тұрғын үй үлесі жоғары, жолдардың тозу деңгейі шамамен 30%, ауыл шаруашылығы өнімдері мен жеміс-көкөніс дақылдарының негізгі түрлерін өсіру мүмкіндігінің жоқтығы негізгі азық-түлік өнімдері бойынша бағаның өсуіне әсер ететін және облыс экономикасының дамуын тежейтін негізгі факторлар болып отыр», - деді Берік Әбдіғалиұлы Үкіметтің бүгінгі отырысында.
Әкім Ұлттық экономика министрлігімен бірлесіп, Ұлытау облысының әлеуметтік-экономикалық дамуының 2022-2026 жылдарға арналған кешенді жоспары әзірленгенін атап өтті. Кешенді жоспар жобасы әртүрлі салалар бойынша жобаларды іске асыруды көздейтін 9 бағыттағы 126 іс-шараны қамтиды.
