Үндістанның әуе компаниясы «Дели-Алматы» бағытында рейс ашпақ
АСТАНА. ҚазАқпарат - Үндістанның «SpiceJet» әуе компаниясы Дели-Алматы бағыты бойынша ұшуды жоспарлап отыр, деп хабарлайды ҚазАқпарат тілшісі.
ҚР ИИДМ Азаматтық авиация комитеті шет елдермен әуе қатынасын кеңейту және шетелдік әуе компанияларын елімізге тарту бойынша белсенді жұмыс жүргізуде.
«Үнділік «SpiceJet» әуе компаниясы тиісті рәсімдерден өтіп, Қазақстан Республикасындағы шетелдік әуе тасымалдаушыны аккредиттеу туралы куәлігіне ие болды. Үндістанның авиациялық билік орындарының бекітуіне сәйкес, «SpiceJet» компаниясына «Дели - Алматы - Дели» бағыты бойынша аптасына 6 рейске ұшуға құқық берілді. Әуе компаниясы аталған бағыт бойынша Боинг 737 ұшағында тұрақты рейстерді іске қосуды жоспарлап отыр», - делінген Азаматтық авиация комитетінің мәліметінде.
Бұл рейстің ашылуы елдер арасындағы сауда-экономикалық байланыстарды арттырады. Қазақстанның транзиттік әлеуетін және туризм саласын дамытуға ықпал етеді.
Айта кетейік, 2018 жылдан бастап Үндістан азаматтары үшін Қазақстан арқылы транзитпен өтетін 72 сағаттық визасыз тәртіп енгізілген және бұл 2019 жылдың соңына дейін ұзартылған.
2018 жылы еліміз арқылы транзиттік жолаушылар саны 45% (2017 - 620 мың адам) артып, 900 мың адамды құрады.
«SpiceJet» - жергілікті және халықаралық рейстерді тұрақты орындайтын үнділік бюджеттік әуе компания. Ішкі рейстерден басқа, компания ұшақтары Ауғанстанға, Бангладешке, Гонконгқа, Таиландқа, Шри-Ланкаға, Біріккен Араб Әмірліктеріне, Оманға және Мальдив аралдарына ұшады.
