Үндістан қара құрдымды зерттеу үшін ғарышқа спутник ұшырды
Үндістанның ғарыштық зерттеулер ұйымы XPoSat спутнигін орбитаға шығарған PSLV-C58 зымырантасығышын ғарышқа сәтті ұшырды. Kazinform агенттігі бұл туралы ТАСС ақпарат агенттігіне сілтеме жасап хабарлайды.
Ұйымның сайтында хабарланғандай, зымыран Сатиш Дхаван атындағы Ғарыш орталығы орналасқан Бенгал шығанағындағы Шрихарикота аралындағы ғарыш айлағынан ұшырылды.
XPoSat спутнигінің міндеті — қара құрдымды зерттеу.
Ведомствоның мәліметінше, бұл құрылғы — аспан көздерінен рентгендік сәулеленуді ғарыштық өлшеу саласында зерттеу жүргізуге арналған алғашқы мамандандырылған ғылыми аппарат.
Спутник екі пайдалы жүкті тасымалдайды: POLIX (астрономиялық бақылау жүргізу үшін рентгендік поляриметр) және XSPECT (рентген спектроскопия және хронометрлеу).
Үндістан ғарыш агенттігінің атап өтуінше, XPoSAT ұшырудың арқасында Үндістан АҚШ-тан кейін қара құрдым мен нейтрон жұлдыздарын зерттейтін станциясы бар екінші ел болды.
Зымырантасығышқа орнатылған жабдық тағы 10 ғылыми тәжірибе жасауға мүмкіндік береді.
