ҰОС ардагерлеріне тегін кешенді медициналық қызмет көрсетілді
АСТАНА. 3 мамыр. ҚазАқпарат - «Ұлттық ғылыми кардиохирургиялық орталығы» АҚ Ұлы Отан соғысының ардагерлері мен тыл еңбеккерлеріне тегін кешенді медициналық қызмет көрсетті. Бұл туралы компанияның баспасөз қызметіне сілтеме жасай отырып, astana.kz сайты хабарлайды.
2-3 мамырда Орталықтың жетекші дәрігер-кардиологтары Астана қаласының Есіл ауданында тұратын Ұлы Отан соғысы ардагерлері және тыл еңбеккерлеріне арнап консультация өткізді. Акция аясында ардагерлер жүрек-қан тамырлары ауруларынан кешенді түрде тексеруден өтті
«2-3 мамырда Ұлттық ғылыми кардиохирургиялық орталығы мамандары әр ардагердің үйлеріне барып, олардың кешегі Отан қорғау ісінде көрсеткен ерліктері мен қаһармандықтары үшін алғыс білдіріп, аталған іс-шараға қатысу үшін шақыру берді»,- делінген хабарламада.
Қарияларға шара барысында орталықтың білікті медицина қызметкерлері бірге ілесіп жүрді. Сонымен қатар, барлық ардагерлерге ескерткіш сыйлықтар табыс етілді.
