Үрімшідегі тәртіпсіздіктер кезінде жасалған қылмыстарға кінәлі 9 адам өлім жазасына кесілді - Қытай
АСТАНА. Қарашаның 10-ы. ҚазАқпарат - Қытайда Шынжаң-Ұйғыр автономиялық өлкесінің әкімшілік орталығы - Үрімші қаласында шілде айындағы тәртіпсіздіктер кезінде жасалған қылмыстарға кінәлі деп танылған 9 адам өлім жазасына кесілді.
Бұл туралы елдің мемлекеттік бұқаралық ақпарат құралдарына сілтеме жасап ИТАР-ТАСС агенттігі хабарлап отыр.
Үрімшідегі бүлікшілік ісі бойынша барлығы 12 адам өлім жазасына кесілді.
Олардың барлығы кісі өлтіру, тонау қылмыстары үшін кінәлі деп танылған болатын. Шілденің 5-інде Үрімшіде орын алған бүлік пен тәртіпсіздіктердің салдарынан 197 адам қаза болып, тағы 1,6 мыңнан астам жергілікті тұрғын жараланған еді.
