Үрімжідегі жарылысты ұйымдастырған күдіктілер анықталды
АСТАНА. ҚазАқпарат - Қытай полициясы Үрімжіде 34 адамның өмірін қиған, 94 адамды жаралаған жарылысты ұйымдастырған 5 күдіктіні анықтады, деп хабарлады «Синьхуа» агенттігі.
Күдіктілердің төртеуі терракт кезінде қаза болды, тағы біреуі полицияның құрығына түсті. Олардың бәрі де көп уақыт бойы діни экстремистердің әсерінде болған. Солардың берген видео, аудио материалдарын көріп-тыңдаған, заңсыз әрекеттермен айналысқан. 2013 жылдың соңында 5 адамнан тұратын ұйымдасқан қылмыстық топ құрып, қолдан жарылғыш құралдар жасап шығарумен айналысқан. Сөйтіп 22 мамырда жергілікті уақыт бойынша таңғы 7:50-де Үрімжіде террорлық акті жасады. Бұл Үрімжідегі 2009 жылғы тәртіпсіздіктерден кейін орын алып отырған ірі лаңкестік. Онда 197 адам қаза болып, 1,7 мыңы жараланған болатын.
