Үскірік аяз салдарынан астаналықтар бір тәулік сусыз қалды
АСТАНА. ҚазАқпарат - Елордада бірнеше үйдің тұрғындары үскірік аяз салдарынан сусыз қалды, бір тәулік өткен соң су қайта беріле бастады, деп хабарлайды ҚазАқпарат.
18 қараша күні таңғы 7-де «Республика, 27» мекенжайындағы 1976 жылы салынған «Астана Су арнасы» МКК су құбыры жарылды.
«Бірден апаттық-қалпына келтіру бригадасы қойылды. Апаттың себебі анықталған соң Республика 27, 29, 26; Ауезов 10 ( «Рахат» монша кешені) мекенжайларындағы үйлердің суы тоқтатылды. Апат себебі - құм қабатының қатты қатуы себепті қозғалуы, қату қалыңдығы - 1 метр», - деп жазды қала басшысы Әсет Исекешев Фейсбуктағы парақшасында.
Әкімдіктің хабарлауынша, су бүгін 15:15-те қайта беріле бастады.
