Үйде кішкентай бала бөлмеге қамалып қалса, не істеу керек
АСТАНА. KAZINFORM — Төтенше жағдайлар министрлігі ата-аналарға пәтерден бір минутқа ғана шықса да, есік кездейсоқ құлыптанып қалып, кішкентай бала үйде жалғыз қалып қоюы мүмкін екенін ескертеді. Бұл жағдай бала өміріне қауіп төндіруі мүмкін. Kazinform оқырманға құтқарушылар кеңесін ұсынады.
Құтқарушылар құлыпты ашуға тырыспауға және қажет болған жағдайда дереу 112 нөміріне қоңырау шалуға кеңес береді.
Есіктің жабылуы қалай төтенше жағдайға айналады?
Егер жабық есіктің артында есікті аша алмайтын немесе көмек шақыра алмайтын кішкентай бала қалып қойса, жағдайға ерекше назар аудару қажет. Әсіресе жабық бөлмеде газ, электр құрылғылары болса, қауіп еселеп артады. Себебі өрт тұтануы, бала құлап қалуы, улануы мүмкін немесе денсаулыққа төнген басқа да қауіптер бар.
Мұндай жағдайларда 112 нөміріне қоңырау шалып, диспетчерге жабық есіктің артында бала жалғыз қалғанын хабарлау қажет. Жағдайды мүмкіндігінше дәл сипаттау маңызды: мекенжай, кіреберіс, қабат, пәтердің нөмірі, баланың жасы және ішінде қауіп көздерінің бар-жоғы көрсетілу керек. Егер бала мазасызданып тұрса немесе оған тікелей қауіп төніп тұрса, операторға оны да хабарлау қажет.
Құтқарушылар келгенге дейін не істейміз?
- Жедел жәрдем қызметіне қоңырау шалғаннан кейін, сабыр сақтау және диспетчердің нұсқауларын орындау қажет.
- Егер бала ересектерді ести алса, онымен байланыста болу: сөйлесу, бәрі жақсы болатынына сендіру және көмек келе жатқанын түсіндіру маңызды.
- Құлыпты өзіңіз ашуға тырыспаңыз, қолға түскен затпен құлыпты бұраудың қажеті жоқ, жарақат алуға, есіктің зақымдалуына әкеп соқтыратын немесе балаға қосымша қауіп төндіретін басқа да әрекеттерді жасамаңыз.
- Сондай-ақ, құтқарушыларға кедергі келтірмеу және мүмкіндігінше олардың оқиға орнына тез жетуін қамтамасыз ету маңызды.
Құтқарушылар жұмысын не қиындатуы мүмкін?
Құтқарушылардың балаға мүмкіндігінше тез жетіп, жағдайды бағалауы өте маңызды. Сондықтан 911 нөміріне қоңырау шалған кезде мүмкіндігінше дәл ақпарат беру керек.
Ата-аналар нақты мекенжайды білмесе, кіреберіс жабық болса, пәтер ішіндегі ықтимал қауіптер туралы операторға хабарламаса немесе есікті өздері ашуға тырысса, бұл құтқарушылар үшін қосымша қиындықтар туындатуы мүмкін. Жедел жәрдем қызметі келгенге дейін өзіңіздің немесе балаңыздың қауіпсіздігіне қауіп төндірмегеніңіз жөн.
Қалай мұндай жағдайдың алдын алуға болады?
Көбінесе мұндай оқиғалардың алдын алуға болады. Кішкентай баласы бар ата-аналарға:
- баласын пәтерде қысқа уақытқа болса да жалғыз қалдырмау;
- кілттердің орналасқан жерін және пәтерге кімнің кіре алатынын бақылап жүру;
- ересек отбасы мүшелері үшін қауіпсіз кіру нүктесін алдын ала жоспарлау;
- баланы қауіпті заттарға немесе қосулы тұрған құрылғыларға жақын қалдырмау;
- егер олар жасы үлкен болса, балаға төтенше жағдайда қалай көмекке шақыру керектігін түсіндіру ұсынылады.
Құтқарушылар, кәдімгі есіктің өзі, егер артында бала қамалып қалса, үлкен кедергіге айналуы мүмкін екенін ескертеді.
— Негізгі ереже — баланы жалғыз қалдырмау және есік кездейсоқ жабылып қалса не істеу керектігін алдын ала жоспарлау. Егер бала ішкеріде қамалып қалса және оның өміріне немесе денсаулығына қауіп төнсе, жедел көмек алу үшін 112 нөміріне дереу қоңырау шалыңыз, — деп еске салды Төтенше жағдайлар министрлігі.
Еске сала кетейік, Қазақстанда 302-ші «Ауыл құтқарушылары» ерікті өртке қарсы құралымы ашылды.
