Ұжымдық жазалау: БҰҰ өкілі Израильдің ауруханаларға шабуылын айыптады
Күзетілетін ауруханаларға шабуыл жасау – халықаралық гуманитарлық құқықты бұзу. Бұл туралы Анадолы агенттігінің сұрағына жауап берген БҰҰ-ның Адам құқықтары жөніндегі Жоғарғы комиссары кеңсесінің ресми өкілі Элизабет Тросселл мәлімдеді, деп хабарлайды Kazinform.
Тросселл ұжымдық жазалау тәжірибесі де халықаралық құқықты бұзатынын айтты.
Ол осыған байланысты Газа секторының тұрғындары негізгі азық-түлік пен қызметтерге қол жеткізе алмай қалғанын еске салды.
Израиль – Палестина шиеленісі
7 қазан күні таңертең ХАМАС-тың «Изз ад-Дин әл-Қассам бригадалары» әскери қанаты Израильге қарсы «Әл-Ақса тасқыны» операциясының басталғанын хабарлады. Газа секторынан Израильге қарай мыңдаған зымыран атылып, қарулы топтар Израиль елді мекендеріне басып кірді.
ХАМАС бұл операцияның оккупацияланған Шығыс Иерусалимдегі Әл-Ақса мешітіне жасалған шабуыл және израильдік қоныстанушылар тарапынан палестиналықтарға зорлық-зомбылықтың күшеюіне жауап ретінде жасалғанын айтты.
Бұған жауап ретінде Израиль армиясы ондаған жойғыш ұшақты пайдаланып, Газа секторында ХАМАС-қа қарсы «Темір қылыштар» операциясын бастайтынын мәлімдеді.
Израиль-Палестина қақтығысы ушыға бастағаннан бері 8,5 мыңнан астам палестиналық қаза тапты. Ресми дерек бойынша, көз жұмған палестиналықтардың 70 пайызға жуығы – әйелдер мен балалар.
Израильде қаза болғандар саны 1500 адамнан асты.
Газа секторының 2,3 млн тұрғыны Израильдің жаппай әуеден бомбалауынан және анклавтың толық блокадасы салдарынан болған азық-түлік, су және дәрі-дәрмек тапшылығынан зардап шегіп отыр.
БҰҰ Бас Ассамблеясы гуманитарлық жүк жеткізу үшін атысты дереу тоқтатуға шақырды. Бұл ретте Иордания ұсынған қарарды 120 мемлекет қолдады. Алайда Израиль бұл ұсынысты қабылдамады.
