Вьетнамда финалға шыққан қазақстандық боксшы қыздардың қарсыластары кім?

АСТАНА. ҚазАқпарат - Вьетнамда өтіп жатқан Азия чемпионатында финалға шыққан қазақстандық боксшы қыздардың қарсыластары белгілі болды, деп хабарлайды ҚазАқпарат ҚР бокс федерациясының баспасөз қызметіне сілтеме жасап.

Кеше жартылай финалда қарсыласын қапы қалдырған 64 келі салмақта ел намысын қорғап жатқан Мадина Нұршаева мен 69 келі салмақтағы боксшымыз Валентина Хальзова финалға өтіп, чемпиондық атаққа бір табан жақындаған болатын.

Бүгін Азия біріншілігінің соңғы күні. Екі боксшы да санаулы сағаттардан кейін шаршы алаңда қытайлық қарсыластарымен айқасып, бас жүлдені сарапқа салады.

Мадина Нұршаева финалда қытай өкілі Ду Данмен жұдырықтасса, Валентина Хальзова қытайлық Гу Хонгпен айқасады.

Естеріңізге сала кетейік, кеше 51 келіде Назым Қызайбай, 75 келіде Дариға Шәкімова, 81 келіде Мөлдір Базарбаева және ауыр салмақта (+81) Ләззәт Күнгейбаева Қазақстан қоржынына қола медаль сыйлаған болатын.