Вьетнамда қуатты дауыл тұрып, ондаған адам мерт болды

АСТАНА. ҚазАқпарат - Вьетнамда болған өте қуатты «Дамри» дауылынан 19 адам құрбан болып, тағы 12 адам із-түзсіз кеткен. Бұл туралы Reuters агенттігі хабарлады.

Табиғат апатынан 370-тен астам үйге зақым келіп, жүздеген электр бағандары мен ағаштар құлады. 33 мың адам қауіпсіз аймаққа көшірілді. Бұған қоса тайфун 40 мың гектарды құрайтын күріш пен каучук плантациялары сияқты ауыл шаруашылығы алқаптарын жайпап кетті.

Дауылдың жылдамдығы сағатына 90 км-ді құраған. Ауа райына байланысты 40 рейстің ұшырылымы кейінгі қалдырылды. «Дамри» дауылы курортты Нячанг қаласын да қиратып кетті. Онда алдағы аптада Азия-Тынық мұхиттық экономикалық ынтымақтастық ұйымының форумы өтуі тиіс болатын.