Ведомствоаралық комиссия: Бірқатар облыстағы тұрақтандыру қорындағы дәрі көлемі ұлғайтылады
НҰР-СҰЛТАН. ҚазАқпарат - ҚР Премьер-Министрінің орынбасары Е. Тоғжановтың төрағалығымен өткен Ведомствоаралық комиссияның отырысында Мемлекет басшысының тапсырмаларын орындау бойынша бірқатар шешім қабылдады, деп хабарлайды ҚазАқпарат primeminister.kz-ке сілтеме жасап.
«Шымкент қаласы, Ақмола, Ақтөбе және Батыс Қазақстан облыстарының әкімдіктеріне тұрақтандыру қорларындағы дәрілік заттар резервінің көлемін ұлғайту тапсырылды», делінген хабарламада.
Еске сала кетсек, Мемлекет басшысы Қасым-Жомарт Тоқаев коронавирус індетінің екінші кезеңіне дайындық мәселелері бойынша кеңесте Үкімет мүшелеріне дәрі-дәрмек бойынша тұрақтандыру қорларын белгіленген нормативке сәйкес жасақтауды тапсырған еді.
«Біз жаз айларында дәрі-дәрмек тапшылығын айқын сезіндік. Менің тапсырмам бойынша нақты жұмыс атқарылды. Атап айтқанда, екі айға жететін қор жасақталып, ең қажетті деген дәрі-дәрмектің тізімі ұлғайтылды. Оны сырттан әкелу және тіркеу тәртібі жеңілдетілді. Бірақ, өңірлерде дәрі-дәрмектерді тұрақтандыру қорларының көлемі және дайындық жұмыстары біркелкі емес», деген еді Президент.
