Вице-министр қазақстандықтарға өрт қауіпсіздігі бойынша нұсқау айтты
АСТАНА. ҚазАқпарат – Төтенше жағдайлар министрінің орынбасары Марат Күлдіков Орталық коммуникациялар қызметінде өткен брифингіде өрт қауіпсіздігінің қарапайым ережелерін тұрғындардың есіне салды, деп хабарлайды ҚазАқпарат тілшісі.
«7 қарашадағы жағдай бойынша ел бойынша алты жүз мыңнан астам рейд жүргізілді. Өрт қауіпсіздігінің жүз мыңнан астам бұзушылықтары анықталды. Жанғыш материалдарды жылыту құрылғыларының жанында сақтау, заттарды пештің үстінде кептіру және басқалары сияқты бұзушылықтардың негізгі бөлігі сол кезде жойылады, қалғандары бойынша ұсыныстар беріледі.
Осыған байланысты, ТЖМ азаматтарымызға өрт қауіпсіздігінің қарапайым ережелерін сақтауға кеңес береді. Яғни, газ баллондарын жылыту құрылғыларының жанында сақтамаңыз, кірді және басқа заттарды пештің үстінде кептірмеңіз, мүмкін болса, мұржаларды тазалаңыз», - деді вице-министр.
Бұған дейін министрлік министрдің орынбасары елімізде 106 мыңнан астам отбасы өрт қауіпсіздігі бойынша есепке алынғанын айтқан еді.
Фото: ortcom.kz
