Вице-министр тарифтермен қатар абоненттік төлемдер енгізуді ұсынды

АСТАНА. Қаңтардың 16-сы. ҚазАқпарат /Арман Асқаров/ - Бүгінде еліміздегі электрстансалардың материалдық - техникалық жағдайы сын көтермейді. Осыған байланысты қандай да бір қаржылық ресурстарды қарастыру қажет.

Бүгін ҚР Табиғи монополияларды реттеу агенттігінің кеңейтілген алқа отырысында ҚР Энергетика және минералды ресурстар вице-министрі Дүйсенбай Тұрғанов осы мәселені атап өтті, деп хабарлайды ҚазАқпарат. «Сондықтан, бүгінде тариф саясатын қайта қарап, электр- қуат өндіруші компаниялардың құрал-жабдықтарын жаңарту ісіне ерекше басымдық беру қажет. Бұл жерде біз Еуроодақ елдерінің тәжірибесін қолдап, оны іске асыруды дұрыс деп санаймыз. Ол мемлекеттерде тұтынушылар электр-қуат саласындағы компаниялармен рәсімделген келісім-шарттардың негізінде желілерді пайдаланғаны үшін білгіленген ақыны төлейді. Бұл ақы бүгінгі абоненттік төлем ретінде компанияға аударылып, электрстансаларының материалдық-техникалық жағдайын жақсартуға жіберіліп отырады. Біздіңше, ондай тәжірибені енгізген жөн», - деді Д.Тұрғанов. Вице-министр атап көрсеткендей, бүгінде еліміздегі электрстансалардағы жабдықтардың тозығы 70 пайызға дейін жеткен.