Волейболдан Қазақстан чемпионаты: Қола жүлде үшін бәсекеде «Жетісу» клубы «Атыраудан» басым түсті

ОРАЛ. KAZINFORM – Орал қаласындағы «Жайық арена» спорт кешенінде волейболдан ұлттық лига клубтары арасында жүлделер үшін шешуші бәсекелер басталды.

Қола медаль үшін алғашқы ойында «Жетісу» (Талдықорған) мен «Атырау» командалары алаңға шықты. 

Марат Адрышев жаттықтыратын жетісулықтар бастапқы екі партияны өз есебіне жазды – 25:14, 25:22. Бұдан кейін Ислам Жұмабековтің шәкірттері қарымта қайтаратындай көрінген – 25:23.

Алайда талдықорғандықтар оған жеткізбеді – 25:21. Қорытынды есеп – 3:1.

Ертең қос команда екінші кездесуін өткізеді. «Жетісу» жеңсе, қола жүлде иесі анықталады.

«Атырау» есе қайырса, үшінші матч ойналады. 

Бесінші орын үшін бәсекеде «Буревестник» өткен жылғы күміс жүлдегер «Павлодарды» тізе бүктірді – 3:0 (25:22, 25:21, 25:21).

Жетінші саты үшін таласта өткен жылғы чемпион «Тараз» СҚО-ның «Есілін» жеңді – 3:0 (25:21, 25:16, 26:24). 

Еске сала кетейік, бұдан бұрын волейболдан Қазақстан чемпионатында «Жайық» клубының финалға жолдама алғанын жазған едік.