Волейболдан Жоғары лиганың ерлер арасындағы командалары арасында А тобында Өскеменнің «Шығыс ?УМЗ» спортшылары көш бастап келе жатыр
АЛМАТЫ. Наурыздың 27-сі. ҚазАқпарат /Ерлік Ержанұлы/ - Кеше волейболдан Петропавлда аяқталған XVII ел чемпионатында Жоғары лиганың ерлер арасындағы командаларының А тобындағы 4-ші тур ойындарының қорытындысы бойынша Өскеменнің «Шығыс-УМЗ» командасы 40 ұпаймен көш бастады,
деп хабарлайды ҚазАқпарат ҚР Волейбол федерациясының баспасөз қызметіне сілтеме жасап.Балалар мен жасөспірімдер спорт мектебінің «Виктория» спорт кешенінде өткен бұл сайыс наурыздың 19-ында басталған болатын. 8 команданың арасында өткен тартысқа толы кездесулерде өскемендіктер топ жарды. Олар барлық ойында қарсыластарын қапы қалдырды. Ал 4 турдың қорытындысы бойынша екінші орында келе жатқан Шымкенттің «ЮКГУ-Қазығұрт» командасының қоржынында да 40 ұпай бар. Дегенмен олар соңғы турда Алматының «ҚазНАУ» командасынан 2:3, Өскеменің «Шығыс-УМЗ» командасынан 1:3, Петропавлдың «Есіл-Виктория» командасынан 0:3 есебімен ұтылып қалды. Ал үздік үштікке енген Оралдың «Жайық-Конденсат» командасында - 32, ал турнир кестесін түйіндеп тұрған Теміртаудың «Арселор-Миттал» командасында 24 ұпай бар.
