Ыстанбұлда Түркияда тұратын отандастардың қатысуымен бизнес-форум өтті
НҰР-СҰЛТАН. ҚазАқпарат – Биылғы жылдың 31 шілдесінде «Отандастар қоры» коммерциялық емес акционерлік қоғамы Түркиядағы ҚР елшілігімен бірлесіп, бизнес-форум ұйымдастырды, деп хабарлайды ҚазАқпарат.
Аталмыш шара «Атамекен» ҰКП сыртқы сауда палатасының Түркия Республикасында 31 шілдеден 1 тамызға дейін өткізетін сауда-экономикалық миссияның бір бөлігі болды.
Іс-шараның негізгі мақсаты – Түркияның қазақ диаспорасы өкілдерімен іскерлік қарым-қатынас орнату.
Бизнес-форум шетелде тұратын отандастармен байланыс орнату және нығайту жөніндегі Қордың бағдарламасының бір бөлігі болып табылады.
Бизнес-форум барысында қатысушылар өзара іс-қимыл тетіктерін, ШОБ және ірі бизнес саласындағы бизнес-бастамаларды ынталандыру, сондай-ақ стартаптарды қолдау және дамыту тетіктерін егжей-тегжейлі талқылады.
Сондай-ақ жиында тоқыма өнеркәсібінің, ауыл шаруашылығының, қызмет көрсету саласының дамуына, технологиялық өндірістерді құруға негізделген түрік нарығының бейінін ескере отырып, осы салаларға баса назар аударылды. Форум қатысушыларына Қазақстан облыстарының инвестициялық әлеуеті таныстырылды.
Форум жұмысына 150-ден астам адам қатысты. Қатысушылар өздерін қызықтыратын стартаптар, бизнес-бастамалар, қолда бар жобалар туралы айтып, спикерлерге сұрақтар қойып, бизнес жоспарлар мен бастамаларды Қазақстанда, сондай-ақ халықаралық нарықта дамыту мүмкіндіктерін талқыланды.
Форум соңында Қордың бірінші вице-президенті Талғат Адуов Түркияда тұратын отандастарды Қордың қазақ үйінің іскерлік үйі мен мәдени орталығы өкілдерін анықтауына белсенді қатысуға шақырды. Сондай-ақ кездесуге қатысушыларды ағымдағы жылдың қараша айында Түркістан қаласында өтетін отандастардың бірінші форумына шақырды. Бұдан басқа, Қор ұсыныстарға ашық және тұратын жеріне қарамастан барлық отандастармен «байланыста» тұрғанын, ол үшін барлық өзекті мәселелер бойынша кеңес беретін және ақпараттық қолдау көрсететін отандастар мәселелері жөніндегі бірыңғай байланыс орталығы арнайы құрылғанын атап өтті.
Түркиядағы бизнес-форум маусым айында Мюнхен қаласында өткен форумнан кейінгі екінші бизнес-форум болып табылады. Келесі Бизнес-форум 2019 жылы 27 тамызда Сан-Франциско қаласында (АҚШ) өтеді.
