Юградағы мұнай резервуарлары өртінің құрбандары саны көбейіп келеді
АСТАНА. Тамыздың 24-і. ҚазАқпарат - Нақтыланған мәліметтер бойынша, Ресей Федерациясының Ханты-Мансы автономиялық округінде мұнай резервуарларының өртенуі салдарынан екі өрт сөндіруші қаза тапқан, бір адам із-түзсіз жоғалған, төрт өрт сөндіруші күйік жарақаттарымен ауруханаға түскен.
Бұл туралы Ресейдің Төтенше жағдайлар министрлігінің ақпарат басқармасына сілтеме жасап РБК агенттігі хабарлады.
Өрт Урай стансасынан солтүстік-батысқа қарай 120 шақырымдай жерде орналасқан «Конда» мұнай айдау стансасының резервуарлық паркіндегі тауарлы мұнай құйылған 8 резервуардың біріне найзағайдың түсуі салдарынан басталған. Өрт бой бермей жатыр. Оқиға орнында қазір Ресейдің Төтенше жағдайлар министрлігі Орал аймақтық орталығының жедел штабы жұмыс істеп жатыр.
