Юлия Путинцева Аустралиядағы жарыстың екінші айналымына шықты

АСТАНА. KAZINFORM – Қазақстанның екінші, әлемнің 105-ракеткасы Юлия Путинцева Аделаида (Аустралия) WTA 500 турнирінің екінші айналымына өтті.

Доданы іріктеу сайыстарынан бастаған Ю.Путинцева алғашқы айналымда әлемнің 93-ракеткасы, мажарстандық Далма Галфиге тап келді.

Қарсыластар осыған дейін екі рет кездесіп, онда Путинцева жеңген еді. 

Бұл жолы екі сет те 6:4 есебімен қазақстандық теннисшінің пайдасына шешілді.

Сағат жарымға созылған бәсекеде Путинцева 2 эйспен бірге 4 брейк-пойнттың екеуін мүлт жібермеді. Галфи 4 эйс жасағанымен, 2 брейк-пойнтты пайдалана алмады.

Юлия Путинцева ширек финалға шығу үшін әлемнің 15-ракеткасы, америкалық Эмма Наварромен таласады.

Тағы бір қазақстандық, рейтингіде 222-орындағы Дмитрий Попко Аустралия ашық чемпионатының іріктеу сайысында әлемнің 113-ракеткасы, америкалық Маккензи Макдональдқа тартысты матчта жол берді – 7:6 (7:4), 4:6, 5:7. 

Еске сала кетейік, бұдан бұрын Қазақстанның теннистен әлемдегі үздік елдердің қатарына енгенін жазған едік. 

Александр Шевченко Аделаида турнирінде азулы қарсыласын камбэкпен жеңді.