Заңғар Нұрланұлы Еуропа теннисі рейтингінде көш бастады

НҰР-СҰЛТАН. ҚазАқпарат - Tennis Europe (TE) ұйымы алдағы жылы күзде Монте-Карлода өтетін Junior Masters турниріне орай жаңартылған рейтингіні жария етті, деп хабарлайды ҚазАқпарат тілшісі.

Қазақстан теннис федерациясы мәлім еткеніндей, Заңғар Нұрланұлы 14 жасқа дейінгілер арасында 255 ұпаймен көш бастады.

З.Нұрланұлы 2021 жылы TE сериясы бойынша өткен алты жарысқа қатысып, жекелей сында соның екеуінде жеңімпаз атанды.

Осы жастағылар арасында сондай-ақ қазақстандықтар Демид Горбачев (36-орын) пен Даниэль Тазабеков (45-орын) үздік елулікке кірді.

Junior Masters - ірі спорттық іс-шара, оған Еуропадағы 14 және 16 жасқа дейінгілер арасындағы ең мықты теннисшілер (8 бозбала, 8 қыз) қатысады. Кезінде осы додада Рафаэль Надаль, Ким Клейстерс, Александр Зверев, Белинда Бенчич секілді теннисшілер чемпион атанған. Жарыс Монте-Карлодағы атақты топырақ төсенішіндегі корттарда өтеді.

Еске сала кетейік, бұдан бұрын үш қазақстандық теннисшінің жастар арасында Аустралия ашық біріншілігінде өнер көрсететінін жазған болатынбыз.