Зарина Дияс Цинциннати турнирінің іріктеу финалына өтті
АСТАНА. ҚазАқпарат - Қазақ теннисшісі Зарина Дияс Western & Southern Open Cincinnati турнирі іріктеу сынының финалына шықты. Ол АҚШ теннисшісі, әлемнің 113-ракеткасы Шелби Роджерсті 6/1, 6/4 есебімен жеңді, деп хабарлады 24.kz.
Зарина аталған турнирдің негізгі сеткасына шығу үшін румын спортшысы Моника Никулескуге қарсы ойнайды. Екі теннисші 2010 жылы Tashkent Open турнирінің 1-айналымында кездесіп, қазақ қызы 3/6, 7(2)/6, 2/6 есебімен ұтылған. Сонымен қатар, Western & Southern Open Cincinnati турнирі іріктеу сынында қазақстандық Ярослава Шведова мен Юлия Путинцева ойнаған болатын. Алайда Ярослава Шведова АҚШ теннисшісі, әлемнің 142-ракеткасы Николь Гиббстен (Nicole Gibbs) 6/7(2), 3/6 есебімен, ал Юлия Путинцева неміс спортшысы Мона Бартельден (Mona Barthel) 4/6, 2/6 есебімен жеңілді.
Сондай-ақ Қазақстан атынан өнер көрсетіп жүрген Михаил Кукушкин жүлде қоры 100 мың АҚШ долларын құрайтын Aptos Challenger турнирінің финалына шықты. Ол жартылай финалда АҚШ спортшысы Райан Уильямсті 6/2, 6/2 есебімен ұтты. Ақтық сындағы қарсыласы жапон Го Соеда мен кипрлық Маркос Багдатис кездесуінен кейін анықталады.
