Зеленский Аляскадағы келіссөздердің басты тақырыбы атысты тоқтату болады деп үміттенеді

Дональд Трамп, Владимир Зеленский және Еуропа елдерінің басшылары қатысқан бейнеконференция аяқталды. Онда Украина аумақтарына қатысты мәселелер талқыланды.

— Біз бүгін осы мәселелерді де талқыладық. Әрине, бұл өте күрделі мәселе. Біз Аляскадағы кездесуді айттық. Келіссөздердің басты тармағы атысты тоқтату болады деп үміттенеміз, — деді ол Германия канцлері Фридрих Мерцпен бірлескен баспасөз мәслихатында.

DW дерегінше, бейнеконференция барысында еуропалық көшбасшылар АҚШ президенті Дональд Трампты Владимир Путинмен кездесуде Киев пен Еуропаның қауіпсіздік мүдделерін қорғауға шақырды.

— Өзгерістерге үміт бар, Украинада бейбітшілікке үміт бар, — деп атап өтті Германия канцлері Фридрих Мерц.

Сонымен бірге, Германия канцлері ықтимал келіссөздердің нақты ретін талап етті: алдымен атысты тоқтату режимі жасалуы тиіс, ал кейінгі кездесулерде Киев келіссөздер үстелінде отыруы қажет.

— АҚШ президенті Дональд Трамп енді Украинадағы бейбітшілік жөнінде келіссөздерді бастағысы келеді. Жұма күні ол Ресей президенті Путинмен Аляскада кездеседі. Анкориджде маңызды шешімдер қабылдануы мүмкін, — деп қосты Мерц Владимир Зеленскиймен Берлиндегі бірлескен баспасөз мәслихатында.

Онлайн-кездесудің қорытындысы жайлы Еуропалық комиссия төрайымы Урсула фон дер Ляйен де пікір білдірді.

— Бүгін біз АҚШ президенті Дональд Трамппен, еуропалық көшбасшылармен және Владимир Зеленскиймен өте жақсы әңгіме өткіздік. Біз Аляскадағы алдағы екіжақты саммит туралы пікір алмастық. Ынтымақтастықты үйлестіруді жалғастыруға келістік, — деп жазды ол X әлеуметтік желісінде. 

Айта кетелік Путин мен Трамп Анкоридждегі әскери базада кездеседі.