Ж.Қасымбек: Ғарыш аппараттарын құрастыру-сынау кешенінің құрал-жабдықтары Қазақстанға биыл жеткізіледі

АСТАНА. ҚазАқпарат - Ғарыш аппараттарын құрастыру-сынау кешенінің құрал-жабдықтары Қазақстанға биыл жеткізіледі. Бұл туралы бүгін халықпен есептік кездесуін өткізген ҚР Инвестициялар және даму министрі Жеңіс Қасымбек мәлім етті.

«Ғарыш аппараттарының құрастыру-сынау кешенін құру бойынша жұмыстар жалғасуда. Аталған кешеннің барлық технологиялық құрал-жабдықтары Еуропада әзірленіп, зауытта сынақтан өтіп, сонда сақтаулы тұр. Құрал-жабдықтар Қазақстанға биыл жеткізіледі», - деді Ж.Қасымбек.

Министрдің айтуынша, заманауи ғарыштық инфрақұрылымды құру ғарыш саласының ғылыми және ғылыми-технологиялық базасын одан әрі дамытуды талап етеді.

«2015 жылы  ғарыш қызметі саласында 26 ғылыми жоба орындалып, 5 жоба тәжірибеге енгізілді», - деді ол.