Жалған кәсіпкерлік белгілері бар 569 заңды тұлғаның мемлекеттік тіркелу күші жойылды - ҚР Бас прокуратурасы
АСТАНА. ҚазАқпарат - ҚР Бас прокуратурасы «көлеңкелі экономикаға» тосқауыл қою саласындағы жұмыстарын жандандырды, деп хабарлады аталған ведомствоның баспасөз қызметінен.
«Прокурорлардың шағымдары бойынша жалған кәсіпкерлік белгілері бар 569 заңды тұлғаның мемлекеттік тіркелуінің күші жойылып, қадағалау актілері бойынша контрагенттерге 50 млрд. теңге қайта есептелді, соның ішінде 19,3 млрд. теңге өндіріліп алынды»,- делінген хабарламада.
Сонымен қатар, ведомствоның атап өтуінше, Президенттің тапсырмасын орындау мақсатында халықты еңбекпен қамту және еңбекақы төлеу саласында прокурорлардың актілері бойынша жұмысшылардың пайдасына 6,5 млрд.-тан астам теңге өндірілді. 163 кәсіпорында қарыздар толық өтелді. 158 мың жұмысшының құқықтары қорғалды.
Алматы қаласы және Қарағанды облысы прокуратуралары проблемалық кәсіпорындар бойынша 271 млн.-нан астам теңгенің (сәйкесінше 115 млн. және 156 млн. теңге) өтелуін қамтамасыз еткен.
