Жалған шот-фактура жазған оралдық кәсіпкерге 6,3 млн теңге айыппұл салынды
ҚР Қаржы министрлігі Қаржы мониторингі комитетінің баспасөз қызметі мәлім еткеніндей, БҚО бойынша экономикалық тергеу департаменті аталған тұрғынның 2017-2019 жылдар аралығында мемлекетке 67 млн теңге залал келтіргенін анықтады.
Атап айтқанда, ол ЖШС-ын пайдаланып, іс жүзінде жұмыстарды орындамай, қызметтерді көрсетпей және тауарларды тиеп-жөнелтпестен шот-фактура жазған. Сол арқылы өзінің коммерциялық кәсіпорнын салық төлеуден заңсыз босатқан.
Орал қаласы сотының үкімімен кәсіпкер ҚР ҚК 28-бабы 2-бөлігі және 216-бабы 2-бөлігі 2-тармағына сәйкес айыпты деп танылды.
Сотталушымен кінәні мойындау туралы мәміле түрінде процессуалдық келісім жасалды. Сондай-ақ оның Қылмыстық-процестік кодексте қарастырылған келісімнің барлық шарттарын орындағаны, соның ішінде келтірілген зиянды толық өтегені ескерілді.
Осылайша кәсіпкерге 6 млн 312,5 мың теңге айыппұл салынды.