Жалғас Жұмағұловтың UFC-дегі екінші жекпе-жегі үшін қанша гонорар төленді
НҰР-СҰЛТАН. ҚазАқпарат – Әбу-Дабиде (БАӘ) өткен UFC 257 турниріне қатысқандардың гонорары белгілі болды. Қазақстандық ережесіз жекпе-жек шебері Жалғас Жұмағұловтың гонорары жария етілді, деп хабарлайды ҚазАқпарат Sports.kz сайтына сілтеме жасап.
«Жауынгерлер аралында» қазақстандық спортшы швед Амир Альбазиге қарсы шығып, төрешілердің бірауыздан қабылдаған шешімімен жеңіліс тапты.
Осы жекпе-жек үшін Жұмағұловқа 13 500 доллар (10 000 доллар – кепілдендірілген гонорар, 3 500 доллар – демеушілік бонус) төленеді.
Альбази 23 500 доллар иеленді, яғни оған кепілдендірілген гонорар мен бонустан бөлек, 10 000 доллар жеңісі үшін берілді.
Бұдан бұрын хабарланғандай, Қазақстандық ережесіз жекпе-жек шебері Жалғас Жұмағұлов UFC-де екінші айқасын өткізді.
