Жаманқұловтың сыбайластары ақшаны қалай жымқырғандарын айтып берді
АСТАНА. ҚазАқпарат - Медеу аудандық №2 сотында «Феникс» кинокартинасының түсіріліміне бөлінген бюджеттік қаражатты жымқыру қылмыстық ісі бойынша тергеліп жатқан күдіктілер бүгін сот алдында алғашқы жауаптарын берді, деп хабарлайды ҚазАқпарат.
Сот алдына бірінші болып, кинокартинаның продюсері Наталья Юдина шықты. Айта кету керек, ол өзінің кінәсін толық мойындап, 2 миллион теңге шығын өтеп берген болатын.
«2014 жылы маусымда Тұңғышбай Жаманқұлов «Феникс» фильмінің өндірісіне бөлінген қаражаттан 6 миллион теңге алып, беріп жіберуді тапсырды. Мен 5,3 миллион теңгені беріп, бұл тапсырманы орындадым», - деп атап өтті сотталушы.
Наталья Юдина аталмыш қаражат қандай жолдармен қолды болғанын айтып берді. 1 миллион теңгеге жуық қаражат «Alma Store» ЖШС директоры, күдікті Марлен Әбішевтің арасында келісімшарт жасау арқылы жымқырылған. Ол келісімшарт бойынша, Әбішевтің компаниясы «Феникс» фильмінің түсіріліміне қажетті бейнеқұрылғылар, байланыс және көлік қатынасымен қамтамасыз етуі тиіс болған. Алайда тергеу барысында анықталғанындай, аталмыш ЖШС сол беті ешқандай қызмет көрсетпеген. Оның үстіне 1,3 миллион теңге «АлекШ» атты басқа да жалған кәсіпорын арқылы алынған.
Тағы 2,3 миллион теңге күдікті Илья Коробейниковтың, атап айтқанда оған тиесілі «SKARABEI STUDIO» жеке кәсіпкерлігі арқылы алынған.
300 мың теңге жүргізуші Владимир Руснаковты жұмысқа алу туралы жалған келісімшарты арқылы жымқыпылған. Наталья Юдина құжатқа жүргізушінің қолын өзі қойған. Қалған 717 мың теңге Тұңғышбай Жаманқұловтың тапсырмасымен «Т.К. TURAN UNIVERSAL BUSINESS» ЖШС есепшісі Назгүл Жүнісованың көмегімен алынған.
Сонымен қатар Тұңғышбай Жаманқұлов Наталья Юдинаға картина режиссері Талғат Жаныбековке, сметада көрсетілмесе де, жалға алынған пәтер ақысын төлеуді міндеттеген. Осылайша, Юдина түрлі жеке кәсіпкерлер арқылы Жаныбековке 1,2 миллион теңге берген.
Айта кеткен жөн, Тұңғышбай Жаманқұловқа 1 миллион теңге шешіп берген Марлен Әбішев Юдинаның жауаптарын шындыққа жанасатынын растады және өз кінәсін мойындады.
