Жамбыл облысындағы 73 елді мекен әлі күнге дейін табиғи газбен қамтылмаған
АСТАНА. KAZINFORM – Жамбыл облысында 73 елді мекен әлі күнге дейін табиғи газға қосылмаған. Биыл жыл соңына дейін газдандыру нысандарының құрылысына 8,5 млрд теңге жұмсау жоспарланып отыр.
2025 жылы өңірдегі 10 елді мекеннің 5 мыңға жуық тұрғыны табиғи газға қол жеткізді. Жыл қорытындысы бойынша Жамбыл және Жуалы аудандарын газдандыру деңгейі 100%-ға, ал Талас ауданында 94,1%-ға жетті.
Дегенмен облыс аумағында табиғи газбен қамту деңгейі әлі де біркелкі емес.
Облыстық энергетика және тұрғын үй-коммуналдық шаруашылық басқармасының мәліметінше, қазіргі уақытта өңірдегі 284 елді мекен табиғи газбен қамтамасыз етілген. Бұл елді мекендерде 1,1 млн адам тұрады. Жалпы облыс халқының 91,8%-ы көгілдір отынға қол жеткізген.
– Табиғи газға қосылмаған 73 елді мекенді кезең-кезеңімен газдандыру жоспары әзірленді. Оны жүзеге асыру үшін жеткізуші газ құбырларын, газ тарату станциялары мен желілерді салу қажет, – деп хабарлады басқармадан.
2026 жылы тағы 5 мыңға жуық тұрғынды табиғи газбен қамтамасыз ету көзделіп отыр. Нәтижесінде облыс халқын газдандыру деңгейін 92,2%-ға жеткізу жоспарланған.
Айта кетейік, бұған дейін Қазақстанда газдандыру деңгейін 80%-ға жеткізу үшін қандай инфрақұрылымдық жұмыстар қажет екені туралы жазған едік.
