22:51, 15 Ақпан 2024 | GMT +6
Жамбылдық полицейлер Қызыл кітапқа енген жануарды атқан тұрғынды ұстады
ТАРАЗ. КАZINFORM - Жамбыл облыстық Полиция департаментінің қызметкерлері «Браконьер» жедел алдын алу іс-шарасы барысында «Сапсан» жедел қызметі инспекторларымен бірлесіп, браконьерлік дерегін жасады деген күдікпен Талас ауданының 48 жастағы тұрғынын ұстады.
Оның тұрып жатқан құмды аймақтағы шаруа қожалығын тексеру барысында Қызыл кітапқа енген қарақұйрық жануарының тушасы, сондай-ақ 2 тегіс ұңғылы қару табылып, тәркіленген.
Департаменттің баспасөз қызметі таратқан ақпаратқа сүйенсек, қазіргі таңда заңсыз аң аулау дерегі бойынша сотқа дейінгі тергеу амалдары басталып, сот сараптамалары тағайындалған.
Айта кетейік, Жамбыл облысының Полиция департаменті 1- 29 ақпан аралығында аймақта «Браконьер» жедел-алдын алу іс-шарасын өткізіп жатыр.
