Жамбыл облысында мас күйінде 51 адамды тасымалдаған автобус жүргізушісі ұсталды
ЖАМБЫЛ ОБЛЫСЫ. Тамыздың 5-і. ҚазАқпарат - Жамбыл облысында жол полициясы инспекторлары мас күйінде 51 адамды тасымалдаған автобус жүргізушісі ұсталды, деп хабарлады ІІМ Жол полициясы комитетінің баспасөз қызметінен.
Ағымдағы жылғы тамыздың 5-інде, сәрсенбі күні 06-50 сағат шамасында Алматы - Ташкент автожолының 215 км Жамбыл облысының Қордай ауданы аумағында жол полициясы қызметкерлері «Сетра» маркалы автобусты мас күйінде басқарған, 40 жастағы жүргізуші ұсталды. Автобустың қозғалыс бағыты «ОҚО, Сарыағаш - Алматы», автобус салонында 51 жолаушы болды.
Автобус жүргізушінің құжаттары әкімшілік сотқа тапсырылады. Оған ҚР ӘҚБтК-нің 467 бабына сәйкес «Жүргізушінің мас күйінде көлік құралын жүргізгені үшін» жүргізуші куәлігінен 2 жыл мерзімге дейін айыру көзделеді.
