Жамбылда пайдаланылмай жатқан 553 мың гектар жер мемлекетке қайтарылды
«Елбасы облысқа жұмыс сапары барысында көптеген ауыл шаруашылығы жерлерінің пайдаланылмай жатқандығына тоқталып, оларды қайтаруды тапсырды. Облыста соңғы 5 жылда пайдаланылмай жатқан 553 мың гектар ауыл шаруашылығы жерлері анықталып, мемлекетке қайтарылды», - деді облыс басшысы.
Кәрім Көкірекбаевтың айтуынша, оның 539 мың гектары экономикалық айналымға қайта тартылды.
«Аграрлық салаға инвестиция тарту мақсатында 295 мың гектар ауыл шаруашылығы жерлері әзірленді. Ағымдағы жылдың 8 айында инвестициялық жобаларды іске асыру үшін барлығы 827 гектар жер бөлінді», - деді ол.
Жалпы өңір басшысының деректеріне сәйкес, Индустриялық-инновациялық дамуда Жамбыл облысы оң нәтижелерге қол жеткізген. Индустрияландыру картасының екінші бесжылдығының аясында 557 млрд теңгені құрайтын 34 жоба жүзеге асырылып, 6 мың жаңа жұмыс орны ашылған. Биыл сомасы 17,3 млрд теңгені құрайтын 13 жоба жүзеге асырылуда. Оларда шамамен 1350 жұмыс орны ашылады.