Жамбылдық құтқарушылар Күйік асуындағы қалың қардан адамдарды қауіпсіз жерге шығарды
ТАРАЗ. ҚазАқпарат - Ауа температурасының төмендеуі, қардың қалың түсуі және көктайғақ салдарынан «Алматы-Ташкент» тас жолы өтетін Жуалы ауданынағы Күйік асуында жағдай қиындады.
Жамбыл облыстық ТЖД баспасөз қызметінен хабарлағандай, өткен тәулікте құтқарушылар Күйік асуындағы қалың қардан 4 жеңіл көлікті алып шықты. Онда 12 адам, соның ішінде үш бала болған. Тараз қаласына жеті адам жеткізілді.
«Қазгидромет» РМК ақпаратынша, 29-30 наурызда Жамбыл облысы аумағында солтүстік-шығыстан соққан желдің екпіні 18-23 м/с дейін, таулы асуларда 30 м/с жетуі мүмкін. Синоптиктер ауа температурасы түнде -3 - 8 градус аязға дейін төмендейді деп болжап отыр. Жамбыл облыстық ТЖД жергілікті атқарушы органдарды, АҚ және ТЖ қызметін тиісті шараларды ұйымдастыру керектігі туралы ақпараттандырды.
