Жаңа оқу жылында астаналық 17 мың балаға орын жетіспеуі мүмкін
АСТАНА. ҚазАқпарат - Астанадағы 95 орта білім мектебінде бүгінгі күні 130 542 бала оқиды. Алдын ала жасалған болжам бойынша, 2017-2018 оқу жылында 17 мың оқушыға орын жетіспеуі мүмкін, деп хабарлайды ҚазАқпарат elorda.info сайтына сілтеме жасап.
Мәлім болғандай, орын тапшылығын жою мақсатында 2 600 орындық жапсарлас салынған 5 мектепті пайдалануға беру жоспарлануда.
«Қазіргі уақытта 11 100 орынға арналған 10 мектептің құрылысы басталды. Нысан 2018 жылы пайдалануға берілуі тиіс. Сонымен бірге 2018-2019 жылдары салынатын 13 мектептің архитектуралық жобасы жасалуда», делінген сайт ақпаратында.
Шешімін таппай тұрған мәселелер мектепке дейінгі салада да жетерлік. Қазір елордада 263 балабақша бар. Оның 96-сы - мемлекеттік, 2 - ведомстволық, 116 - жекеменшік. Бұған қоса 49 шағын орталық жұмыс істейді. Соған қарамастан, күн сайын балабақша кезегіне орташа есеппен 90 бала тұрады (60-70 сәби дүниеге келеді, 20 бала көші-қон есебінен).
Жалпы алғанда, бұл кезекте бүгінгі күні 33 240 бала тұр. Бұл проблеманы шешу үшін 2017 жылы 480 орындық - екі мемлекеттік балабақша, мемлекеттік-жекеменшік серіктестік аясында 720 орындық 3 балабақша пайдалануға беріледі. Қазіргі уақытта 2019 жылы пайдалануға берілетін 1 680 орындық балабақша бойынша 6 жоспар іске асырыла бастады. Білім басқармасы арқылы жыл сайын мемлекеттік тапсырыспен 10 мың орындық жеке балабақша ашу жоспарлануда.
