Жаңадан балалар театр труппалары мен студиялары ашылады

АСТАНА. ҚазАқпарат – Жаңадан балалар театр труппалары мен студиялары ашылады. Бұл жайында еліміздің Мәдени саясатының тұжырымдамасын таныстырған Мәдениет және спорт министрі Асхат Оралов мәлім етті, деп хабарлайды ҚазАқпарат тілшісі.

«Өскелең ұрпақты рухани-адамгершілікке тәрбиелеу мақсатында «Оқушының мәдени нормативі» мәдени-білім беру жобасы жалғасады. Оған концерттер мен көрмелерге бару, опера, балет және драмалық спектакльдерді, қазақстандық және шетелдік кинофильмдерді, мультфильмдерді көру кіреді», - деп жазады министр Telegram парақшасында.

Оның атап өтуінше, жан басына қаржыландыру аясында балалар мен жасөспірімдерді шығармашылық үйірмелермен кезең-кезеңімен қамту жалғасады.

«Шығармашылық үйірмелермен қатар жаңадан балалар театр труппалары мен студиялары ашылады. Сондай-ақ, балалардың Қазақстан театрлары мен музейлеріне ай сайын баруы үшін «Театрдағы күн» және «Музейдегі күн» жобалары іске асырылады. Театр сабақтары өскелең ұрпақтың шығармашылық дағдыларын дамытуға көмектеседі. Сондай-ақ осы топтардағы балалармен қатар ерекше қажеттіліктері бар адамдарды да сахна өнеріне баулитын жоба әзірленіп жатыр», - деді Асхат Оралов.