Жаңадан салынған білім нысандарының сапасы қандай - депутат пікірі
АСТАНА. ҚазАқпарат - Жаңадан салынған білім нысандарының сапасы жақсы, сын көтермейтіндері де бар. Бұл туралы бүгін Мәжілісте «Нұрлы жол» бағдарламасы аясында салынған білім нысандарының құрылысына қатысты пікір білдірген депутат Павел Казанцев айтты, деп хабарлайды ҚазАқпарат тілшісі.
«Пайдалануға берілген мектептердің сапасын түрлі бағалар едім. Өте тамаша сапада салынған мектептер бар. Жазғы кезеңде депутаттар өңірлерде барынша сапалы, сәйкесінше инфрақұрылымы мен жабдықтары бар нысандарды көрді. Мұнан бөлек, сапасын жақсарту қажетті нысандар да бар. Дегенмен, толықтай алғанда жағдайды түзетуге болады», - деді ол отырыс аясында БАҚ өкілдеріне берген сұхбатында.
Осы ретте депутат жағдайды түзетуге уақыттың бар екендігіне сенімді екенін баса айтты.
«Қазір біз кетіп бара жатқан пойыздың вагонына отырайық деп тұрғанымыз жоқ. Алда 2019 жыл бар. Бұл бағдарламасы соңына дейін жеткізуге, аяқтауға уақытымыз жеткілікті. Сондықтан да қазір бұл әңгіме көтеріліп отыр. Себебі жағдайда түсініп, дер уақытында шаралар қабылдау үшін аралық жоспардың қорытындысын шығармақпыз», - деді Павел Казанцев.
Оның пайымынша, еліміздің Білім және ғылым министрлігі білім нысандары құрылысы төңірегіндегі түйткілді мәселелерді ертерек көтеруі тиіс болатын.
«Меніңше, барлық уақытта да басына, яғни Білім министрлігіне қарауы тиіс деп ойлаймын. Егер олар қаржыландыру процесіне, жергілікті атқарушы органдардың өндірістік цикліне ықпал ете алмаса да кемінде "аттан" салу керек еді. Қазір депутаттар дабыл көтеріп отыр», - деді Мәжіліс депутаты.
