Жаңақорған жастары мұқтаж отбасыға асар әдісімен үй салып берді

ҚЫЗЫЛОРДА. KAZINFORM – Қызылорда облысы Жаңақорған ауданының ерікті жастары мұқтаж отбасыға 13-ші баспананың кілтін сыйлады.

Бұл жолы оған Айдаровтар отбасы ие болды. Отағасының мүмкіндігі шектеулі, інісінің тіл мүкістігі бар және науқас анасы олармен бірге тұрады.

– Бізге «үй береміз» деп айтқан жоқ. Мешітке шақырған соң келгенмін. Ойда жоқта осындай тосынсый жасады. Арманымызға жетуге атсалысқан жомарт азаматтарға алғыс білдіремін, – деді қуаныш иесі Әлия Әбжалова.

«Жаңарған Жаңақорған жастары» қоғамдық қоры құрылғалы бері баспанаға аса мұқтаж отбасыларды осылай қуантуды дәстүрге айналдырған. Ұйым белсенділері 13-ші үйді де асарлатып салып бітірді. Шамасы жеткендердің бір тобы құрылысқа атсалысса, бірі жарық жүргізіп, екіншісі газ жеткізіп берді. Аудан азаматтары қаржылай көмегін де, қол көмегін де аяған жоқ.

– Үйді кім алатынын соңына дейін ешкімге айтпаймыз. Күні бұрын ғана ақылдасып, ортақ шешімге келеміз. Қолымызда баспанаға мұқтаж жандардың тізімі бар. Қайсысы қандай жағдайда тұрып жатқанын көргенбіз, бәрін білеміз. Әуелгі уақытта үйді пәтер жағалап жүрген көпбалалы отбасыларға үлестірдік. Осы күні мүмкіндігі шектеулі адамы бар отбасыларға басымдық беріп жүрміз. Ең басты талап – үйге шын мұқтаж болуы керек, – деді қор өкілі Әбдісамат Әбдіш.

Кеше түркістандық жастар 9 баласы бар отбасыға үй салып бергенін жазған болатынбыз.